ꞌBuuk ꞌcĩ baa ẽhẽẽd Maarko ꞌcĩ baa haĩ ꞌthaar ũgĩ Yõaannẽ Maarko cieeni. Baa ĩĩn nẽẽ nyahaappan umwa ꞌJeruꞌthalẽma, baa nga aaĩ Yeesu ĩĩca, baa nẽ ikia ĩĩ nẽẽ nuyyioohit cĩ Yeesu. Ma uruta, iita ookorit nẽẽ hĩ ꞌthooyyiahit ꞌPaaulo nẽ tarĩ ma urutaa cĩ, ikia ẽẽl nẽẽ ꞌthooyyiahit ꞌPẽẽtũrũ. Thõõthaa cĩ rũgẽt cĩ Yeesu, ẽdtẽbana nẽẽ thooꞌthiok cĩg ꞌJudeei ꞌcĩg mẽẽlĩg hĩ nyepiteeꞌnya cĩggĩĩng. Nẽẽthĩ tarĩ, ẽhẽẽd nẽẽ, hátĩ hẽẽl eet ꞌcĩg hõllõngaa ĩĩn ꞌJudeei ꞌcĩg baag iita ĩĩtõ nuyyiook cĩg Krĩstõ.
ꞌBuuhaa cĩ, aduha Maarko thooꞌthiok ꞌcĩg ĩdĩman Yeesu hĩllõõan thooꞌthiok ꞌcĩg baag aduha nẽẽnĩ. Hĩcĩnĩt naag ꞌgõõl ꞌcĩ baa adĩmanĩ Yeesu thooꞌthiok ꞌcĩg mẽẽlĩg ꞌcĩg ĩnaatti, aaꞌnyĩk eet ꞌcĩg mẽẽlĩg hũbũttaathõ, ẽẽla eet ꞌcĩg mẽẽlĩg ꞌtirriaanaa cĩ lori ꞌcĩ abathĩ nẽ baa atamaatĩk ꞌthẽccanẽẽt cĩg eetuk. Ẽtẽrꞌtha dtiicanĩ cieeg makaaꞌthĩt cĩ Yeesu, Eet ꞌcĩ aku hĩ Nyekuc, hikia hadaak nẽ õõga eet ꞌtirriaanaa cĩ ꞌthẽccaneetu.
Aduha Maarko dtẽẽllẽn cĩg rũgẽt cĩ Yeesu hĩ dtiic cĩnnĩ, iꞌthianaanĩ baattithimooa cĩnnĩ ĩĩ baa aggameek ĩnõõnnõ Yõaannẽ. Ẽdtẽbana thooꞌthiok cĩg waathinniook ꞌcĩg adtuurna jurrung, õõaa cĩ toddoiinit cĩ Yeesu hurucceea nẽ ẽdẽcaak teheedinit cĩ ꞌbuuk icci thõõthaa ꞌcĩ huturi ĩcĩ rũgẽt cĩ Yeesu, hĩ ngaatĩ odongiini nẽẽ daahĩtha.
